Pang-chān:Lohankhapedia

Lohankhapedia，台語維基的漢字鏡射站。

緣起

台語的書寫系統爭議幾十冬，主要有兩種系統：羅馬字佮漢字。以言文一致(我手寫我喙)的角度來看，干焦羅馬字符合標準。漢字本身有一字多音佮文白異讀的特性，真僫達到言文一致的標準。總是，看的速度較緊，而且大眾接受度嘛較懸。台語維基是用白話字寫的，符合文字記錄語言的精神，但是較無方便讀，降低一般人使用的動機。

敢講無兩全其美的方式？這就是Lohankhapedia想欲達到的目標。

Lohankhapedia以無改變台語維基的內容為前提，利用機器學習技術，將白話字文章轉寫做有標音的漢字文章。透過Lohankhapedia，你會當用漢字讀台語維基文章，抵著袂曉讀的漢字，會當看標音，達到言文一致兼快速閱讀的目標。Lohankhapedia毋是欲閣創一个新的台語百科。想欲寫新文章，請去台語維基寫，予貢獻會當集中。Lohankhapedia會自動佮台語維基仝步。

向望有一工，咱會當用家己的母語，來認捌世上逐款的智識！

功能

• 自動轉寫
• 人工校正
• 逐工佮Wikipedia仝步
• 支援正體佮簡體漢字
• 支援開關標音
• 支援Wikipedia口座登入(OAuth)

按怎讀

預設顯示標音的漢字文章, 若毋知漢字的讀法, 會當看漢字頂懸的羅馬字(佇本文第一擺出現的時)。

"文A" icon會當切換顯示模式，有"正體標音"，"正體無標音"，"簡體標音"，"簡體無標音" 4種。

按怎校正

你會當用Wikipedia口座登入，抑是anonymous(顯示IP)，來修改文章。

請針對錯誤的漢字進行修改，以外的修改會造成編輯失敗。

若是猶原出現編輯失敗，有可能是你欲改做的漢字無佇Lohankhapedia規範的漢字發音內底，請參考漢字標準。

漢字標準

Lohankhapedia毋是一个討論漢字愛按怎寫的所在，所以以台灣教育部辭典(教典)為準，若無規範，或者是根據文獻(甘字典，台日大辭典)，或者是漢羅表示。

例外: 無使用教典用字的

教典用字	音	本站用字	理由
𪜶(左亻右因)	in	怹	𪜶佇一寡作業系統猶無法度顯示，改用教典替代用字
相𫝛(上相下同)	sio-siāng/sio-siâng	相像	相𫝛佇一寡作業系統猶無法度顯示，改用教典替代用字
𫝛(上相下同)	siāng	siāng	𫝛佇一寡作業系統猶無法度顯示，改用羅馬字

教典無收的詞

詞	本站用字	出典
oân-á	原仔	台日大辭典
O-lân	荷蘭	台日大辭典
Liû-khiû	琉球	台日大辭典

FAQ

Q1: Lohankhapedia錯字真濟。

A1: 錯字有幾个來源:

1. 原文就寫毋著矣。請去台語維基改。
2. 這个音無佇Lohankhapedia的漢字標準內底。有可能是外來語，方言差。
3. 有影轉毋著。機器翻譯無法度作到100%正確，Lohankhapedia容允人工校正漢字，歡迎鬥來改。