Pang-chān:Bîn-cho̍k
 |
這篇文章有白話字的版本。 參考這篇文章的白話字版本。 |
民族（
民族，照「nation」兮用法，也有倚近「國家」兮意思，包括政治性兮邦國（state）佮地理性兮國家（country）。像民族、邦國、國家、族群等等，遮兮用語言佮兮意思有差總是使用當中加減有曖昧兮所在。
有兮國家本身嘛通算一个民族，總是嘛有真濟民族無建立起主權性兮國家，比論美洲兮Iroquois儂。
語源佮翻譯[修改]
「民族」即字是近代對西洋言語比論英語「nation」兮翻譯，代先來源是法語兮「nacion」，有「誕生」、「出生地」兮意思。語源是拉丁語兮「natio」，照字意思著是「出世」。
「Nation」，若參考華語界兮即款新翻譯，通講「國族」，總是若考慮著關聯兮用語，比論「nation-state」，會造成循環定義兮問題。
民族兮觀念[修改]
國家佮公民式[修改]
佇親像英國、法國、西班牙、荷蘭、美國佮加拿大即類國家，𪜶兮民族是一款較政治式、公民式佮領土性兮用語，毋是倚靠宗教、種族、族群或者是文化咧使用，是照自身邦國兮領土定出來兮政治成員。對即款國家來講，民族兮成員著是國家兮公民，不管是出世做本國儂或者是後來歸化兮。
文化佮族群式[修改]
嘛有一款民族觀念是倚靠種族、族群、宗教、歷史抑其他文化元素決定兮。𪜶兮成員有可能是繼承兮，非自願兮物，特別較關心𪜶共同祖先兮概念。若照即款意思，𪜶兮民族是天生生成兮代誌。即款文化抑族群式兮民族觀念，產生兮所在是18世紀兮德國，而且像東歐洲佮世界其他所在播揚。
族群式兮民族，雖罔一般嘛有建國兮目標，總是會當佇無建國兮情形當中存在。這對一寡認家己做民族，毋過無國家兮人群來講是特別合用。無國家民族（stateless nation），有比論西班牙兮Catalunya儂、英國兮蘇葛蘭儂，閣有加拿大兮Quebec儂。遮兮民族無一定卜建國。𪜶是毋是有國家，大份是關係著權力政治兮問題。比論對Kurd民族來講，已經為建國拍拚真濟年冬，總是猶原受國際政治兮阻礙。